ROXAS CITY – Patay ang isa ka barangay kagawad matapos ginpaulanan sang luthang sang wala pa makilala nga mga suspek nga sakay sang nagaduag pula nga Toyota Innova sa isa ka talyer sa Barangay Cagay, Roxas City.
Nag-angkon sang mga igu sa iya nga ulo kag lawas ang biktima nga si Kagawad Onel ‘Dodoy’ Arandez sang Barangay Punta Tabuc, sining siyudad.
Sa interview sang Bombo Radyo kay Police Master Sergeant Ramil Arcangeles, tagpamaba sang Roxas City Police Station, ginpahayag sini nga samtang nagapakaayo sang iya nga motorsiklo si Arandez sa nasambit nga talyer, gulpi na lamang nga nag-abot ang isa ka salakyan sakay ang mga suspetsado.
Suno pa sa mga nakakita nga apat ka mga indibidwal nga may suksok nga ‘bonnet’ ang nagpanaog sa salakyan kun sa diin duha sa mga ini ang nagpaulan sang luthang kay Arandez.
Mahibaluan nga una na nga naaresto si Arandez sa ginkasa nga drug buybust operation sang Philippine Drug Enforcement Agency.
Dugang pa diri, ginakabig nga High Value Target si Arandez bangud isa ini ka public official kag na-identify sadto nga nagaduso sang ilegal nga droga kag kalakip man sa Directorate for Intelligence (DI) list sang pulisya.
Apang gin-athag ni Arcangeles nga indi pa nila matumod sa karon kun ano ang motibo sang mga suspek sa pagluthang-patay sa nasambit nga barangay kagawad.
