ROXAS CITY – Ginapangita karon ang barangay kagawad nga subject sa drug buy bust operation matapos nakapalagyo sa mga nag-operate nga mga pulis.
Nakilala ang suspek nga si Kagawad Roel Isada alyas Padoy sang Barangay Mapulang Bato, Dao, Capiz.
Ginpatigayon ang nasambit nga operasyon matapos nagtingub pwersa ang Philippine Drug Enforcement Agency (PDEA) Region 6, Provincial Drug Enforcement Unit kag Dao Municipal Police Station para maaresto ang nasambit nga kagawad nga kilala nga drug personality.
Yara na sila sa tunga tunga sang transaksyon sang magduda ang suspek nga pulis ang iya nga kaatubang, rason nga matapos makuha ang P1,000 nga marked money hinali ini nga nagdalagan sa likod sang ila balay.
Narekober sang mga operatiba sa balay sang suspek ang napulo ka sachet sang ginapatihan shabu nga nakasulod sa kaha sang sigarilyo.
Samtang magluwas sa ginahimo nga sideline sang nasambit nga kagawad ang pagduso sang droga ginaalegar nga may kaangtanan man ini sa illegal gambling nga bookies.
