Nagpatigayon sang clean-up drive kag misting operation ang mga opisyal sang Barangay Libas, Roxas City, agud mapunggan ang dugang nga paglapta sang dengue, matapos makumpirmar ang 13 ka kaso sang nasambit nga balatian.
Sa interview sang Bombo Radyo Roxas kay Barangay Kagawad Marrel C. Olano, Committee on Health sang Barangay Libas, iya ginpahayag nga ginpatigayon ang misting operation ang ginsundan sang clean-up drive kahapon.
Nagpartisipar sa aktibidad ang mga residente sang Purok 2 kag Purok 3, mga Barangay Health Worker (BHW), CAPENRO, mga barangay tanod kag iban pa nga mga personnel.
Suno kay Olano, ang 13 ka kumpirmado nga kaso sang dengue ang tanan halin sa Sitio Punta Libas, rason nga ginpabakod sang konseho sang barangay ang kampanya sa pagpaninlo sang palibot kag pagpahanumdom sa mga residente nga mangin responsable sa paglikaw sang nasambit nga balatian.
Ginpahayag man niya nga nakig-angut na sila sa City Health Office tuhoy sa sitwasyon. Apang, misting operation ang ila ginpatigayon sa baylo sang fogging operation, bangud suno sa iya, indi ini ginarekomendar sang talatapan.
