ROXAS CITY – Gilayon nga naghimo sang pila ka mga lihok ang lokal nga gobyerno sang banwa sang Jamindan kasunod sang pagkompirmar nga residente sang amo nga banwa si Patient 13, ang 45 anyos nga lalaki nga nagpositibo sa coronavirus disease (COVID-19) sa probinsiya.
Ini ang ginpahayag mismo ni Mayor Mac Arthur Valdemar sang mainterview sang Bombo Radyo.
Suno kay Valdemar nga mismo ang ila nga Municipal Health Office ang nagpalab-ot sa iya sang impormasyon nga nag-positibo sa amo nga balatian ang Person Under Investigation (PUI) nga residente sang Barangay Lucero, sang amo nga banwa.
Bangud diri, ginpahayag ni Valdemar nga gilayon siya nagpatawag sang isa ka sinapol nga gintambungan sang magkatuhay nga ahensiya sang gobyerno agud mahinalaan ang ila igadihon nga lihok.
Suno kay Valdemar nga nagpapanaog siya sang isa ka Memorandum Order nga nagamandu sa pagpaidalom sa Barangay Lucero sa Extreme Enhanced Community Quarantine kag Enhanced Community Quarantine naman sa kaiping sini nga mga kabaranggayan.
Sa idalom sang Extreme Enhanced Community Quarantine, wala na ginapahanugutan nga maguwa sa ila barangay ang mga taga-Barangay Lucero kag indi naman pwede masudlan sang iban nga tawo ang ila barangay.
Ginpahayag ni Valdemar nga pagadul-ungan na lamang sang food packs ang mga residente sa amo nga barangay.
Gilayon man sila nagpatigayon sang contact-tracing sa mga pumuluyo nga nakasugata ni Patient 13 kag ginpanugyanan nga magpaidalom sa self quarantine.
