ROXAS CITY – Gilayon nga naghimo sang tikang ang lokal nga gobyerno sang banwa sang Mambusao kasunod sang pagkompirmar nga residente sang Barangay Manibad, sang amo nga banwa si Patient No. 22, ang 53 anyos nga lalaki nga nagpositibo sa coronavirus disease (COVID-19) sa probinsiya.
Ini ang ginpahayag ni Punong Barangay Violeta Labo sang napakig-angutan sang Bombo Radyo Roxas.
Suno kay Labo nga ginpaidalom na sa Extreme Enhanced Community Quarantine ang nasambit nga barangay.
Gilayon man nagpatigayon sang contact-tracing sa mga pumuluyo nga nakasugata sang nasambit nga pasyente kag ginpanugyanan nga magpaidalom sa self quarantine.
Mahibaluan nga ang nasambit nga lalaki ang isa ka seaman kag may yara sang travel history sa Metro Manila.
Ginapahayag nga sadtong Enero pa ini nakapauli sa banwa sang Mambusao apang nagbalik pa ini sa Metro Manila para sa iya nga training.
Ginapahayag nga naglain ang pamatyag sini sadtong Marso 20, 2020 rason nga nagpacheck-up ini sa ospital kag gilayon nga na-confine tubtob nga nagguwa ang resulta sang laboratory examination nga positibo ini sa COVID-19.
