ROXAS CITY – Ginpasiguro sang alkalde sang banwa sang Mambusao nga ginahimo nila ang tanan agud malikawan ang paglapta sang coronavirus disease (COVID-19) sa Barangay Manibad sang amo nga banwa.
Suno kay Mayor Leodegario Labao Jr. nga nagpatigayon na sang mass disinfection sa bilog nga barangay kasunod sang pagpositibo sang isa ka residente sa nasambit nga balatian.
Ginpaidalum man sa dugang nga 10 diyas nga home quarantine ang mga himata sang nagpositibo nga persona kun sa diin wala sila ginapasugtan nga maguwa sa ila tagsa ka mga panimalay.
Ginkumpirmar man ni Labao nga ginadumilian anay nga magpauli sa amo nga barangay ang nagpositibo sa COVID-19 sa sulod sang isa ka bulan.
Gindugang pa sang alkalde nga nagtakup na ang 14-day quarantine sang mga persons under monitoring (PUM’s) sa nasambit nga barangay apang wala man sang sang may nabatyagan nga mga sintomas sang amo nga balatian.
