Nagapangatubang sang kaso kriminal ang isa ka opisyal sang barangay sa syudad sang Roxas matapos makitaan sang prima facie evidence batuk sa iya may kaangtanan sa ginaalegar pagbaton sang ₱50,000 kabaylo sang appointment sang isa ka barangay official.
Sandig sa dokumento, si Jeovany Arapol Balsote ang indicted bangud sa ginaalegar paglapas sa Section 3(b) sang Republic Act 3019, ukon ang Anti-Graft and Corrupt Practices Act, kag Section 7(d) sang Republic Act 6713, ukon ang Code of Conduct and Ethical Standards for Public Officials and Employees.
Nasaad sa dokumento nga may yara sang prima facie evidence, nga nagasiling nga ginaalegar nagbaton si Balsote sang P50,000 kabaylo sang appointment ni Pascual Gemido bilang secretary sang Barangay.
Samtang, ang iban naman nga kaso batuk sa iban pa nga respondents ang gin-dismiss bangud sa kakulang sang ebidensya agud ma-establisar ang reasonable chance of conviction.
Ginamandu man sa dokumento nga ang pila ka mga transaksyon sang Barangay Bolo ang i-refer sa Commission on Audit Regional Office VI.
Pila sa mga transakyon nga i-review amo ang ginaalegar collection sang mga bayad para sapagkuha sang barangay clearance nga wala naga-issue sang official receipts sang 2024.
Lakip man ang ginaalegar pag-release sang pondo sang barangay para sa streetlights projects sang 2024, sa diin gin-report nga ginkuha halin sa Barangay Appropriation Ordinance No. 01-2024 antes ang approval sang Roxas City Council.
Ang procurement kag implementasyon sang streetlights, materials, masonry work, electrical work, construction sabg footbridges, kag ang open canal sang 2024 ang i-review man.
Ginahingyo man ang Commission on Audit nga magpatigayon sang audit kag i-report ang ano man nga mangin resulta sang investigating office.
