Ginsabat sang Barangay Official nga si Bobby Dorado ang reklamo may kaangtanan sa ginapahayag nga indi patas nga pagpatuman sang Cash for Work sa Barangay Cabugao, Panitan, Capiz.
Sa panaysayon ni Dorado, natapos na ang napulo ka adlaw sa pag-ubra sang cash for work sa ila lugar.
Nahibaluan nga nagsugod ang amo nga programa sa ila barangay sang Setyembre 11. Sang natapos na nga nalimpyuhan ang mga lugar nga prayoridad nga pagatinluan, naghinyo si Dorado sa ila Barangay Kapitan sang Setyembre 19, Huwebes nga adlaw nga palimpyuhan man sini ang Sitio Pili sa amo man nga barangay nga kun sa diin nagapuyo si Noe Dilay.
Ginpanginwala ni Dorado ang reklamo nga ginpabot ni Dilay nga ginlaktawan sang mga benepisyaryo ang porsyon sa pulu-an sini. Apang, suno kay Dorado, natamaan lang nga wala ini naabtan sang estimated meters sang pagalimpyuhan.
Dugang pa sini, subong lang nakabaton sang kasubong nga reklamo ang ila barangay sa madugay na nga pagpatuman sang amo nga programa sa ila lugar.
Matandaan nga personal nga nagpadulong sa talatapan sang Bombo Radyo si Noe Dilay, residente sang amo nga barangay nga kun sa diin ginareklamo sini ang indi patas nga pagpatuman sang Cash for Work sa ila lugar.
Mensahe ni Dorado sa mga pumuluyo sang Barangay Cabugao, preparado ini nga mag-serbisyo sa tanan bilang barangay kagawad, gani kun may problema, indi magduha-duha nga magpalapit sa iya agud maistoryahan sang maayo. Nagapati ini nga bisan ano nga problema basta naga-intindihanay, masolusyunan ini gilayon.
