ROXAS CITY – Ginkumpirma ni DILG Capiz provincial director John Ace Azarcon nga may daku nga papel ang barangay sa Road Clearing Operation 2.0.
Ini bangud klaro sa Memorandum Circular 2020-027 nga pirmado ni DILG Secretary Eduardo Año nga kinahanglan sila mag-comply sa direktiba nga hawanan ang tanan nga obstruction ukon sablag ang karsada agud mangin masulhay ang dalagan sang trapiko kag malikawan ang delay sa biyahe.
Magasumiter man sang progress report ang kabaranggayan kag monthly report sa national level.
Ginpahayag ni Azarcon nga pananglitan mapaslawan ang natungdan nga LGU nga ma-comply ang Road Clearing Operation 2.0, magapangatubang sila sang administrative sanction.
Bangud diri ginpahanumdum ni Azarcon ang mga LGUs nga indi pagbalewalaon ang nasambit nga direktiba bangud may mga personnel sila nga maga-monitor kun ginapatuman ang nasambit nga mandu.
Naghinyo sang kooperasyon kag suporta ang opisyal sa mga alkalde bangud indi sila ang makabenepisyo diri, kundi ang mga pumuluyo.
Naghinyo man ini sa mga pumuluyo nga magserbe nga mata sa dalanon agud gilayon sila makapalab-ot sang ila makita nga mga nagalapas sa pagsulundan.
