Pabor ang mga Barangay Officials sang Barangay II, Roxas City sa Mandatory Drug Testing sang Department of the Interior and the Local Government (DILG).
Sa interview sang Bombo Radyo kay Punong Barangay Joelito Aguil, iya ginpahayag nga dako nga bulig sang mandatory drug test sa pagpasangkad sang integridad kag kredibilidad sang mga opisyal sa serbisyo publiko.
Suno kay Aguil, importante nga ang mga opisyal sang barangay mangin maayo nga ehemplo sa ila mga nasakupan.
Pahayag pa niya, handa kag kumpyansa ang tanan nga katapo sang iya barangay sa nasambit nga tikang nga magapakita sang ehemplo sa mga pumuluyo.
Nahibaluan nga ang DILG kaupod ang Philippine Drug Enforcement Agency ang nagaduso sa implementasyon sang drug-free workplace programs sa barangay kag kabanwahanan sa diin ang mandatory drug tests ang himuon nga isa ka surpresa, ukon indi mismo pag i-anunsyo.
