Barangay Officials sa Roxas City, nagpanugyan sa publiko nga indi paghimuon nga bentaha ang kalamidad agud makapangawat

Nagpanugyan ang mga opisyal sang Barangay Culasi, Roxas City nga indi paghimuon nga bentaha ang kalamidad kaangay sang bagyo agud nga makapangawat.
 
Sa interview sang Bombo Radyo kag Barangay Kagawad Enrico A. Joseph, iya ginpahayag nga indi dapat magpangawat sa isigkapareho ilabi na sa tion sang bagyo, bangud kon madakpan, mahimu nga mapreso kag pasakaan sang kaso.

Suno kay Joseph, bisan pa nga gin-lift na ang wind signal number sa Capiz, padayon gihapon ang ila pagmonitor kag pagbantay sa coastal areas sang barangay agud masiguro ang seguridad sang pumuluyo.

Ginpahanumdom man sang opisyal sa mga pumuluyo nga magbinuligay sa isa kag isa kag magsunod sa mga pagsulondan, agud malikawan ang peligro sa tion sang kalamidad.