Tuman ang pagpasalamat sang mga Barangay Officials sang Barangay Milibili, Roxas City nga nangin venue sang pagpanagtag sang bugas sang national government.
Sa interview sang Bombo Radyo kay Punong Barangay Annabelle Roxas, iya ginpahayag nga daku nga kadungganan nga makit-an si President Ferdinand Marcos Jr. kag First Lady Liza Marcos sa personal kag makaupod sa pagpanagtag sang bugas.
Suno kay Roxas, daku gid nga bulig sa 500 ka mga benepisyaryo ang nasambit nga programa kun sa diin 300 ang mga mangunguma gikan sa Barangay Bolo, Bato, Bago, kag Milibili, samtang 200 naman ang gikan sa nagkalain-lain nga sektor lakip ang mga Persons with Disabilities (PWDs) kag single parent agud makapiyan-piyan sa ila pang-adlaw adlaw nga pagpangabuhi.
Nahibaluan nga ginpangunahan ni President Marcos ang pagpanagtag sang bugas sa syudad sang Roxas, para sa mga mangunguma kag vulnerable sectors bilang kabahin sang padayon nga programa sang administrasyon sa pagbulig sa mga komunidad sa tunga sang nagataas nga presyo sang pagkaon kag gatong.
