Barangay Officials sang Baybay, Roxas City, ginasiguro nga mapabilin nga matinlo ang lugar agud mangin destinasyon sang turista ang coastal area

ROXAS CITY, CAPIZ – Ginpasiguro sang Barangay officials sang Baybay, Roxas City nga mapabilin nga matinlo ang lugar ilabi na nga madamo subong ang mga nagalagaw sa coastal area bangud sa manami nga tyempo.

Sa interview sang Bombo Radyo kay Punong Barangay Erwin Oroceo, iya ginpahayag nga adlaw-adlaw  ginatinluan ang shoreline agud nga manami ini nga malagawan sang mga pumuluyo kag mangin sang mga turista.

Suno kay Oroceo, wala man ginadumilian ang mga tawo nga maglakat-lakat sa kilid sang baybay ukon magpaligo sa dagat magluwas lang kun malain ang tyempo.

Napangabay ang natungdan sa publiko nga likawan ang paghaboy sang basura sa dagat agud indi ini makaapekto sa palibot kag sa pagbisita sang mga dumuluong.