ROXAS CITY – Wala sang problema sa barangay officials sang Cagay, Roxas City kun madayon man ukon indi ang Barangay and Sangguniang Kabataan Elections (BSKE) sa Nobyembre 2, 2026.
Sa interview sang Bombo Radyo kay Barangay Kagawad Isidro Aragon, iya ginpahayag nga preparado ini nga magbaton sa kun ano ang mangin desisyon sang otoridad.
Suno sa iya, magapadayon lang siya sa pagtrabaho kag pagserbisyo sa mga pumuluyo, ano man ang mangin resulta sang ginaduso nga pag-isol sang eleksyon.
Nahibaluan nga ginaduso ni Negros Occidental third district Rep. Javier Miguel Benitez ang House Bill 10591 nga naga-postpone sang Barangay kag Sangguniang Kabataan Elections sa Nobyembre 2, 2026 kag patigayunon sa Nobyembre 2028.
Para kay Kagawad Aragon, ang importante lamang amo nga mapadayon sang barangay officials ang pag-perform sang ila katungdanan kag mag-focus sa ila responsibilidad sa komunidad.
Dugang pa sang natungdan, wala nagadepende ang ila trabaho sa eleksyon bangud nagapabilin nga prayoridad sini amo ang pagserbe sa barangay.
