ROXAS CITY-Dismayado ang Barangay Secretary sang Barangay Culasi sining siyudad matapos nga wala ginpasulod sa isa ka bangko nga nahamtang sa Capiz Business Center sa Barangay Tiza, Roxas City.
Sa interview sang Bombo Radyo kay Barangay Secretary May Necesario nga sining adlaw sang Lunes nagpadulong ini sa isa ka banko agud nga mag-withdraw kuntani sang suweldo sang mga barangay officials apang wala ini ginpasulod.
Ginpahayag ni Necesario nga nakasuksuk man ini sang Personal Protective Equipment ukon PPE kag nagsakay pa sa ila nga patrol.
Apang, ginkakibot na lamang sini sang ginharangan ini sang guwardiya kag wala ginpasulod sa nasambit nga bangko.
Dugang pa sini nga natigayon lamang ini makasulod bangud may yara sang kakilala sa nasambit nga bangko si Punong Barangay Teresa Almalbis.
Magluwas diri, ginpahayag pa sini nga nasuli pa ini sadtong Miyerkules sang nagwithdraw man ini sang kuwarta.
Nahibaluan nga ginharang ini sang guwardya matapos nga natukiban nga residente ini sang Barangay Culasi sining siyudad.
Bangud diri, nakabatyag ini sang diskriminasyon matapos nga natukiban nga residente ini sang amo nga barangay kun sa diin nakapagkit ini sang kaso sang local transmission.
