ROXAS CITY — Arestado ang 37-anyos nga barangay tanod nga ginatudlo suspek sa paghimulos sa iya man lang himata nga nagapang-edaron sang 6-anyos sa isa ka banwa sa Capiz.
Base sa impormasyon nga nakuha sang Bombo Radyo, nagahampang ang bata nga si alyas Tintin sang ginsakwat ini sang hubog nga suspek nga si alyas Boy kag gindala sa iya balay nga kaluyo man lang sang balay sang lolo kag lola sang biktima kun sa diin ini nagapuyo.
Didto kag alegar nga ginhimo sang suspek ang paghimulos sa bata kun sa diin iya nga ginpasulod ang iya tudlo sa kinatawo sang biktima.
Suno pa sa tiya sang bata, nabatian niya nga nagahibi ang biktima rasun nga iya ini ginpangita kag didto niya ini nakita sa isa ka hulot sa balay sang suspek kag ginabitbit na ang iya underwear nga nahuba.
Nagpakuno-kuno pa suno diri nga nagakatulog sa pihak nga hulot ang suspek nga kasubong wala sang natabo.
Gilayon nga nagpanawag sang bulig sa ila mga kasilingan ang tiya sang biktima rasun nga nadakpan ang suspek.
Ginpanginwala naman ni Boy ang akusasyon, apang suno diri nga gintuad niya sa kapulisan nga hubog siya kag nasapding lamang ang kinatawo sang biktima.
Nahibaluan nga wala sang pamilya ang suspek kag isahanon lamang nga nagapuyo sa iya balay, samtang yara naman sa pag-amuma sang iya lolo kag lola ang biktima bangud naglakat sa Metro Manila ang iya ginikanan.
