ROXAS CITY – Isa ka maayo kag aktibo nga Barangay Tanod si Octavio Sales, 48-anyos sang amu nga barangay.
Ini ang paglaragway ni Barangay Kapitan Ignacia Herrera-Santacera sang Barangay Dapdapan, Sapian Capiz sang mainterview sang Bombo Radyo.
Sa interview sang Bombo Radyo kay Barangay Kapitan Ignacia Herrera-Santacera sang Barangay Dapdapan, Sapian Capiz ginpahayag sini nga isa lamang si Sales sa iya mga Barangay Tanod ang iya mapabugal.
Matandaan nga kahapon nga adlaw, gin-implementar sang search warrant sang gintingub nga pwersa sang mga katapo sang Criminal Investigation and Detection Group ukon CIDG Capiz, Sapian Municipal Police Station, kag Highway Patrol Group sa iya puluy-an sa Brgy. Dapdapan, Sapian Capiz si Sales.
Nakuha sa paghinakop sini ang isa ka unit sang 12 gauge home made shotgun kag 5 ka mga bala sini, isa ka home made 5.56 revolver, kag isa ka caliber 38 nga may pito ka mga bala.
Ang nasambit nga search warrant ang gin-isyu kag ginpirmahan ni Hon. Judge Judith Orendain-Tonogbanua sang RTC 6th Judicial Region Mambusao Capiz Branch 20 Napetsahan Hulyo 3, 2023.
Dugang pa sang amu nga barangay kapitan, ginkakibot niya ang natabo nga pagkadakop kay Sales bangud wala ini nagahuna-huna nga may yara sang ginahuptan nga indi lisensyado nga armas-luthang ang amu nga barangay tanod.
Sa karon nagapabilin si Sales sa kustodiya sang CIDG Capiz kag natalana nga pasakaan sang kaso nga paglapas sa RA 10591 ukon “Comprehensive Firearms and Ammunition Act.”
