ROXAS CITY – Patay ang isa ka barangay tanod matapos nagbunggo ang ginamaneho sini nga motorsiklo sa ginasundan nga salakyan sa Barangay Banica, Roxas City.
Ginkilala ang biktima kay Ricardo Villanueva, 63 anyos, residente kag barangay tanod sang Barangay Lawaan, sining siyudad.
Base sa inisyal nga imbestigasyon sang traffic section sang Roxas City Police Station, gikan sa bulangan ang biktima kag pauli na kuntani sa ila nga balay.
Nagtuyo ini nga mag-overtake sa salakyan nga ginamaneho ni Adonis Brillantes, 48 anyos sang banwa sang Panit-an, Capiz nga tuyo man kuntani nga magliko rason nga iya ini nga nabungguan.
Bangud sa kabaskugon sang pagkabunggo sang biktima sa nasambit nga salakyan, tumampilak ini sa pihak nga porsyon sang karsada kag nalampos ang iya nga ulo sa semento.
Suno pa sa pila ka mga nakakita nga madasig ang pagpadalagan sang biktima sa iya nga motorsiklo.
Nag-angkon sang patal nga pilas sa ulo ang biktima rason nga gindala ini sa Roxas Memorial Provincial Hospital apang gindeklarar nga dead on arrival.
