ROXAS CITY-Patay ang 37-anyos nga barangay tanod matapos nga gintiro sang wala matumod nga suspek sa Barangay Sinabsaban Cuartero Capiz.
Ginkilala ang biktima nga si Relic Estorque, residente sang nasambit nga lugar.
Sandig sa inisyal nga imbestigasyon sang Cuartero Municipal Police Station nagaguha nga samtang nagaisahon sa ila nga panimalay ang biktima, ginaalegar nga ginsulod ini sang wala matumod nga suspek kag gintiro tubtob mapatay.
Samtang sandig naman sa pahayag sang amay sang biktima nga si Wilfredo Estorque ginaalegar sini nga naga harvest ini sang mais sang hinali nga nakabati sang asod-asod nga lupok gikan sa ila nga panimalay.
Sa pagpauli sini, nakita na lamang sini ang biktima nga nagahuray-ad na sa ila nga panimalay kag nagapaligo sang kaugalingon nga dugo.
Gintinguhaan pa nga gindala sa Dao District Hospital ang biktima apang gindeklarar nga dead on arrival sang attending physician nga si Dr. Jeffrey De Tomas.
Narekober sa crime scene ang walo tanan ka mga basiyo kag isa ka bala sang ginapatihan kalibre .9mm nga armas-luthang.
Mahibaluan nga may yara sang kaso nga Robbery nga ginpangatubang ang biktima sang tinalikdan nga mga tinuig apang nakatigayon ini nga makaguha sa bilangguan.
Sa karon nagapadayon ang imbestigasyon sang mga kapulisan agud matumod ang ang suspek.
