ROXAS CITY – Nagdepensa ang team leader sang mga barangay tanod sa Barangay 9, Roxas City sa alegasyon sang isa ka residente sa amo nga lugar natuhoy sa ila pagpangsita kasunod sang ginapatuman nga curfew hours.
Suno sa barangay tanod nga si James Abaracoso, wala sang kamatuoran ang alegasyon sang nasambit nga residente nga pwersahan nila nga ginpasarado ang tiyangge sini.
Ginpahayag ni Abaracoso nga samtang sila ang naga-duty, ila nasiplatan nga may isa ka residente nga nagbakal sa amo nga tiyangge rason nga ila ini ginpangabay nga kun pwede isarado na lamang ini agud wala na sang maguwa pa nga pumuluyo kag magbakal.
Apang sa baylo nga magsunod, ginkaakig ini sang tag-iya sang tiyangge tubtob sa nagluntad na ang pagbaisay sang magtimbang nga bahin rason nga nagpanawag na lamang sang responde sa kapulisan si Abaracoso.
Sang pag-abot sang mga pulis, aminado si Abaracoso nga didto pa lamang siya naathagan nga indi nila mahimo mapasarado ang mga tiyangge sa baylo sitahon lamang ang mga nagaguwa nga pumuluyo kag nagabakal.
Suno diri nga wala man sila napa-intiendi natuhoy sa sini nga pagsulundan.
Apang ginbali naman ni Abaracoso ang alegasyon sang tag-iya sang tiyangge nga nagaduty sila nga yara sa idalom sang impluwensiya sang makahulubog nga ilimnon bangud suno diri wala ini sang kamatuoran.
