Gindepensahan karon sang treasurera sang Barangay Hipona, Pontevedra, Capiz si Punong barangay Resty Oquendo batuk sa alegasyon nga ginharass sini ang mga vendors sa old public market sang barangay sang nagligad nga Sabado nga adlaw.
Sa interview sang Bombo Radyo kay Helen Bacaro, ginpahayag sini nga wala ginpahalin ni Kapitan Oquendo ang mga vendors sa daan nga merkado kundi ginhinyo lamang nga kun mahimo kada market day nga Miyerkules kag Sabado sa bag-o nga public market sang Barangay Hipona sila magbaligya.
Suno kay Bacaro nga isa ka semana antes ang opening sang bag-o nga public market sa Crossing Texas, gin-imbitahan ang mga vendors sang punong barangay nga didto sa bag-o nga merkado magbaligya sang ila mga produkto.
Apang kasubong sarkastiko kag may pag-insulto pa ang nangin sabat sang mag-iloy nga Merlinda kag Rosemarie.
Ginkumpirma man ni Bacaro ang ginbuy-an nga pahayag ni Kapitan Oquendo nga poderoso kag ginaaway pa sang anak ni Nanay Merlinda ang mga vendors rason nga ang iban nagtransfer na lamang.
Suno pa diri nga nagpasalamat naman ang iban nga mga vendors nga nagpatindog sang bag-o nga merkado bangud may yara na sila sang pwestuhan sang ila baligya.
Ginkumpirma man ni Bacaro nga indi magbayad sa ila ginrentahan nga pwesto ang mga vendors sa bag-o nga merkado sa sulod sang isa ka tuig bilang kunsiderasyon sa ila bangud sa pandemya.
