Nagahimo na sang preparasyon ang Barangay 11 sa Roxas City agud maatubang ang posible nga epekto sang El Niño, partikular na ang kakulang sang suplay sang tubig kag ang posible nga malawig nga init nga panahon.
Sa interview sang Bombo Radyo kay Punong Barangay Rufino Dunton sang Barangay 11, iya ginpahayag nga importante nga mangin handa ang barangay agud maminusan ang epekto sang nagahilapit nga El Niño sa ila mga residente.
Kabahin sa ginatan-aw nga preparasyon ang pag-identify sang mga lugar nga posible makabaton sang problema sa suplay sang tubig kag ang pagpangita sang posible nga madugangan nga pagkukunan sang tubig.
Ginapanawagan man ang mga residente nga mangin responsable sa paggamit sang tubig kag likawan ang pag-usik sini, ilabi na kon magtuhaw ang malawig nga init nga panahon.
Padayon man nga ginamonitor sang barangay ang sitwasyon agud makapanghanda sang nagakaigo nga tikang para sa seguridad kag kinahanglanon sang ila mga pumuluyo.
