PRESIDENT ROXAS – Ginapasiguro ni Mayor Receliste Escolin sang President Roxas Capiz nga ila masolusyunan ang problema sa pagabutangan sang ila mga basura.
Sa interview sang Bombo Radyo kay Escolin ginpahayag sini nga wala mahakot ang mga basura sa merkado kag sa mga kabarangayan bangud wala na sila ginpasugtan sang Local Government Unit (LGU) sang Pontevedra nga mag haboy sa ila dumpsite, kag nasamad man ang ila truck nga ginagamit nga ginapanghakot sang basura.
Suno pa dri nga nga mahimo na sila makahaboy sang basura sa syudad sang Passi, sa Iloilo pinaagi sa isa ka Memorandum of Agreement (MOA) apang nagapanumdum man sila nga magastuhan ang banwa bangud kinahanglan nila nga magbayad adlaw2x sa LGU kag pagagastuson sa kada biyahe.
Dugang pa ni Escolin nga may yara man sang holding area nga diri pwede temporaryo nga ipahamtang ang mga basura samtang wala pa nadala sa syudad sang Passi.
Bangud sini nagapangabay si Escolin sa mga pumuluyo nga kung mahimo mag-obserbar ang mga ini sang insakto nga waste segregation agud indi mabudlayan ang mga nagakuha sang basura kag ini ang pagsulundan sang tagsa ka mga LGU.
Pagklaro ni Escolin nga wala sini ginapabay-an ang problema sa basura sa pihak nga ini ang yara na sa iya katapusan nga termino kag daw halos wala na nagahalin sa munisipyo.
