ROXAS CITY – Gilayon nagpatigayon sang pagpangusisa ang hepe sang Hospital Management Section sang gobyerno-probinsiyal sang Capiz natuhoy sa paghaboy sang mga hazardous wastes sa likod sang Out Patient Department sang Roxas Memorial Provincial Hospital sa Barangay Lanot, Roxas City.
Suno kay Dr. Alex Ramon Nolasco, base sa iya nga pagpanalawsaw, kalakip sa ginhaboy sa nasambit nga lugar amo ang mga personal protective equipments (PPE’s) nga gingamit sang mga frontliners humalin sang nagsugod ang coronavirus disease (COVID-19) pandemic.
Ginklaro sang opisyal nga wala siya sang ihibalo kun sin-o ang direkta nga nagmandu sa paghaboy sang mga basura apang nahibaluan sini nga temporaryo lamang ini nga ginpabutang sa amo nga lugar.
Ini bangud nga napuno na ang Material Recovery Facility (MRF) sang nasambit nga ospital.
Ginklaro man sini nga indi pa matransport ang nasambit nga mga basura sa Pollution Abatement Systems Specialists, Inc. nga nabas-se sa Iloilo bangud may yara sila sang minimum nga tatlo ka tonelada ukon 3, 000 ka kilo sang basura sa kada ospital antes nila ini kuhaon.
Gindula man ni Nolasco ang pagkahangawa sang publiko bangud suno diri, tatlo ka beses nga na-disinfect ang mga PPE’s sang gin-uba ini sang mga frontliners kag antes ini gin-dispose.
Mahibaluan nga magluwas nga hepe sang HMS, si Nolasco man ang opisyal nga chief of hospital sang RMPH apang sa karon, ang nagaserbi nga officer-in-charge ukon OIC sa amo nga posisyon amo si Dr. Edmarie Tormon.
