Patay ang isa ka bata nga babayi matapos malumos sa suba nga sakop sang Barangay Ilaya, Pontevedra, Capiz.
Ang biktima naga-edad sang tatlo ka tuig kag residente sang amo nga barangay.
Sa interview sang Bombo Radyo kay Police Captain Denis Lobaños, Officer-in-charge sang Pontevedra Municipal Police Station, iya ginpahayag nga nagpadulong sa suba ang bata kaupod ang iya lima ka tuig nga magulang agud paliguan ang ila hinuptanan nga kuring, apang hinali lang nga nalumos ini.
Gilayon nga nagpangayo sang bulig ang magulang kag gindala pa ang biktima sa ospital, apang gindeklarar nga dead on arrival.
Suno pa kay Lobaños, wala nahibaluan sang ila lola nga nagpadulong sa suba ang mga bata.
Nagpanawagan ang pulisya sa publiko nga bantayan sang maayo ang mga kabataan agud malikawan ang kaangay nga insidente.
