Napaslawan ang bata ni anay Interior Secretary Mar Roxas nga maagaw ang congressional seat sang primero distrito sang Capiz sang Mayo 12 nga piniliay.
Ginbaton ni Paolo Roxas ang kapierdihan kay Pinuno party-list Rep. Howard Guintu, nga nakakuha sang 131,545 ka mga boto base sa Final and official results nagikan sa datos sang Commission on Elections subong nga adlaw Mayo 14.
Samtang, nakakuha naman sang 109,249 ka mga boto si Roxas.
“Nagdesisyon na ang kadam-an, tapos na ang eleksyon. Bisan indi pabor sa akon ang desisyon, ginabaton ko ini sing bug-os. Ang akon tagipusuon wala sang iban kundi ang pagpasalamat,” suno kay Paolo.
“Ginhimo namon ang tanan para sa amon pinalangga nga lugar. Wala kami sang ginhinulsulan. Ginhatagan ako sang pinakamasadya nga eksperyensya sa akon kabuhi. Padayon kita sa paghandum.”
Sa pihak nga bahin, ginlutos naman ni Capiz Governor Oto Castro si Nonoy Contreras agud depensahan ang iya incumbency, samtang si James “Mitang” Magbanua ang nagdaug sa pagka-bise gobernador.
Nagapabilin naman sa ila nga pwesto si Roxas City Mayor Ronnie Dadivas kag Vice Mayor Teresa Almalbis sa pagka-alkalde sang siyudad.
