Isa ka bata nga lalaki sa Huaihua, Hunan province sa China ang nagtuga sang atensyon sa social media kag sakit sang ulo para sa mga rescuers matapos aksidente nga makandato ang combination padlock sa sulod sang iya ilong!
Suno sa report, nagahampang ang bata kag nagatinguha nga ilugon ang hitsura sang mythological character nga “Bull Demon King” sang aksidente nga nagsara kag nag-lock ang padlock sa iya septum rason nga daw kaangay nga may bull ring ini.
Gintinguhaan pa ini nga kuhaon sang iya ginikanan apang napaslawan bangud sa kasakit kag sa kahadlok nga magisi ang ilong sang bata kon piliton.
Bangud sini, napilitan sila nga magpangayo sang bulig sa mga bombero.
Sa tuman ka delikado nga butungon ini, ang mga rescuer naggamit sang gunting ukon steel cutter agod mahalungon nga gub-on ang kandado samtang ginalikawan ang pagkasamad sang bata.
Samtang ginakuha ang kandado, ang bata nagpabilin nga kalmado sa bug-os nga proseso.
Sang ginkuha ang kandado, nagpromisa ang bata nga indi na gid magsuksok sang bisan ano sa iya ilong.
