Daku ang kalipay sang isa ka bata sang mangunguma matapos ini nga makapasar sa Licensure Exam for Teachers 2025.
Sa interview sang Bombo Radyo kay Joana De Los Santos, iya ginpahayag nga bata pa lang ini , handum na niya ang mangin isa ka manunudlo.
May plano pa ini kuntani nga magbalhin sang eskwelahan sa una nga tuig sang kolehiyo bangud sa mabudlay nga set-up sang klase apang apisar mabudlay, iya ginpadayon ang kurso Bachelor Of Science in Education Major in English.
Suno kay De Los Santos, nagdesisyon sila sang iya nga mga abyan nga magkuha sang board examination pagkatapos sang ila nga graduation agud nga fresh pa ang ila nga mga natun-an sa ila nga buluthu-an.
Pahayag pa niya, nakabulig gid ang iya nga strategy sa pagtu-on kun sa diin naga gunting ini sang papel nga ginasulatan sang notes agud nga makapasar sa nasambit nga pasinawan.
Tuman man ang iya pagpasalamat sa iya nga ginikanan nga nagsakripisyo agud nga mapatapos ini sa pag eskwela kag sa iya mga utod nga wala nagakataka sa paghatag sang bulig kag suporta.
Naghatag man ini sang mensahe sa mga kaangay nya nga wala ginpalad nga makapasar nga magpadayon sa gihapon bangud nga may tama gid nga tyempo para sa tanan nga bagay.
