ROXAS CITY – Ginapatihan nga pagpangawat ang motibo sa pagpatay sa mangunguma nga si Vergillio Calipayan Surallo sa Sitio Ilawod, Barangay Parian banwa sang Sigma.
Sa interview sang Bombo Radyo kay Raymund Surallo, bata sang biktima, ginpahayag sini nga kahapon nga adlaw gindul-ong niya ang iya amay gamit ang iya tricycle sa banwa agud magkuha sang senior pension nga P1,500.
Wala man suno diri nakainom ang iya amay sa amu nga adlaw kag wala may nakit-an nga nagpadulong nga bisita sa balay sang iya amay.
Mahibaluan nga nagaisahanon lang sa iya puluy-an ang biktima kag may kalayuon ang balay sang iya bata apisar sa pareho lang nga Sitio.
Dugang pa sini nga wala sang kontra ukon record sa barangay ang iya amay kag ginlaragway pa ini nga mabuot kag indi dalok.
Dako ang iya pagpati nga ginkawatan ang iya amay bangud nagsaylo man ang posisyon sang iya tricycle kag kasubong ginlukit ang iyabihan.
Tuman man ang sakit nga iya nabatyagan bangud gintubsan pa ang tigulang niya nga amay kag nasaksihan pa sini nga nagapaligo sa kaugalingon nga dugo, damo lagob ang nawong kag may dako nga pilas sa dalunggan kag baba.
Matig-a naman ang lawas sang biktima sang nasapwan kaina alas-7 sang aga gani nagapati siya nga gab-i palang posible patay na ini.
Nagapanawagan si Raymund sa responsable sa pagpatay sa iya amay nga magsungka kag atubangon ang ginhimo nga krimen.
