Gintawag ni Batangas 1st District Representative Leandro Leviste ang National Bureau of Investigation (NBI) nga “National Bureau of imbento” matapos gin-anunsyo sang ahensya ang pagpasaka sang reklamo para sa qualified human trafficking batok sa iya kag sa anum ka iban pa.
Sa isa ka post sa Facebook, ginkwestyon ni Leviste ang imbestigasyon sang NBI, nga naga-alegar nga ginagamit sang ahensya ang pundo sang publiko agud “maghimo-himo sang kabutigan.”
Ang pahayag ni Leviste kasunod sang pahibalo ni NBI Director Melvin Matibag nga ang bureau maga-file sang reklamo sa Department of Justice angut sa ginaalegar “honey trap” nga operasyon nga nagapuntirya kay Executive Secretary Ralph Recto.
Magluwas kay Leviste, ginalakipan sang mga respondents ang anay Negros Oriental 1st District Congressman Jacinto “Jing” Paras kag lima ka iban pa.
Ginpanginwala ni Leviste ang anuman nga kahilabtanan sa ginaalegar plano.
Suno sa NBI, natapos na sini ang ila imbestigasyon kag natipon na ang mga ebidensiya nga gamiton sa reklamo, nga igasumiter sa DOJ para sa preliminary investigation.
Wala pa sang pinal nga desisyon sang korte angut sa mga alegasyon batok sa mga respondents.
