ROXAS CITY -Ginkompirmar sang Regional Information Officer sang Land Transportation Office ukon LTO Region 6 nga padayon ang pagpatuman sang ahensya sang ‘bawal-angkas’ sang mga motorista sa Western Visayas.
Ini ang ginapahayag ni Ms. Riza Otayde, Regional Information Officer sang Land Transportation Office ukon LTO Region-6 sang mainterview sang Bombo Radyo.
Ginpahayag ni Atayde nga nagapadayon ang pagpatuman sang ahensya sang ‘bawal-angkas’ sa mga motorista apisar nga pamilya pa ang ila nga angkas.
Apang gin-athag sini, nga wala sang dakpanay kag multahanay nga nagakahinabo.
Suno kay Atayde nga ginasaway sang mga katapo sang LTO ang mga motorista nga nagalapas sa ‘bawal-angkas’ apang kun nagpakatig-a ang isa ka motorista, gilayon nga gina-isyuhan sang Temporary Operators Permit ukon TOP.
Samtang aminado naman ahensya nga mabudlay ang pagpatuman sang bawal angkas ilabi na sa mga magpamilya.
Suno kay Atayde nga mangin ang mga regional offices sang LTO ang nag-apelar man nga pasugtan ang pag-angkas sa mga motorsiklo ilabi na sa mga magpamilya, apang tubtob subong wala pa sang sabat gikan sa LTO-national office.
Nagpangabay man si Otayde nga samtang wala pa nasabat sang LTO-National Office ang apelar sang mga LGU, likawan sang mga motorista nga magpa-angkas bisan ila pamilya.
