Gin-anunsyo sang aktibista nga grupo nga Bagong Alyansang Makabayan (BAYAN )nga ginatun-an nila ang pag-file liwat sang reklamo sa impeachment batok kay Bise Presidente Sara Duterte sa gilayon nga matapos ang isa ka tuig nga ban sa Pebrero 5, 2026.
Suno kay BAYAN chairperson Teddy Casiño, nakadepende ang plano sa desisyon sang Korte Suprema sa ila apelasyon matapos nga gindeklarar sang korte nga unconstitutional ang mga nauna nga artikulo sang impeachment batok kay VP Duterte sang tinalikdan nga tuig.
Ginpahayag ni Casiño nga madamo sang gindugang nga kondisyon ang Korte Suprema rason nga mas nabudlayan ang pagpasaka sang impeachment, apang ginpasalig sini nga may intensyon ang grupo nga padayunon ini.
Matandaan nga sang Disyembre 2024, ang BAYAN kag ang Makabayan bloc nagpasaka sang impeachment complaint nga naga-akusar kay Duterte nga naglapas sa pagsalig sang publiko bangud sa ginaalegar indi maayo nga paggamit sang confidential funds, subong man ang pagpamahog sa pila ka mga opisyal sang gobyerno.
Apang ang Korte Suprema nagdesisyon sang Hulyo nga ang mga mamalidha naglapas sa isa ka tuig nga pagsulundan sa pagdumili, gani mahimo lamang sila mag-file sang bag-o nga reklamo pagkatapos sang Pebrero 2026.
Suno kay Casiño, kun maaprubahan ang ila appeal, padayunon nila ang impeachment trial sa senado. Kon indi, maga-file sila sang bag-o nga reklamo.
Samtang, wala pa sang desisyon ang grupo kun magpasaka sang separado nga impeachment case batok kay Presidente Ferdinand Marcos Jr.
