Nagpanindugan ang grupo nga Bayan Muna nga indi dapat pag-ipaanggid ang paggamit sang mga alyas sang mga baganihan sa mga pangalan nga makita sa mga acknowledgement receipt nga may kaangtanan sa confidential funds sang Office of the Vice President.
Ang pahayag ang kasunod sang pagsambit ni Senator-Judge Robin Padilla sa paggamit sang mga alyas sang pila ka mga baganihan kag rebolusyonaryo, lakip na si anay Senador Benigno ‘Ninoy’ Aquino bilang depensa sa paggamit sang mga alyas sa confidential funds documents.
Sa interview sang Bombo Radyo kay Atty. Neri Colmenares, Chairman sang Bayan Muna, iya ginpahayag nga may maathag nga kinalain sa katuyuan sang paggamit sang alyas sang mga baganihan nga masami may kaangtanan sa seguridad kag pagtago sang ila identity sa tion sang pagpakig-away kun ipaanggid sa paggamit sang mga ngalan sa mga acknowledgement receipt para sa mga transaksyon sang kwarta gikan sa pondo sang gobyerno.
Samtang, ginpahayag ni Senator-Judge Bam Aquino nga apisar nga naggamit si former senator Benigno “Ninoy” Aquino Jr. sang alyas nga “Marcial Bonifacio,” wala ini sang kaangtanan sa kompidensyal nga pondo kag ang iya ngalan wala makita sa mga acknowledgement receipt sang nasambit nga pondo.
