Nagpanawagan ang grupo nga Bayan Panay sa gobyerno nga siguruhon ang patas nga pagpatuman sang bag-o nga wage increase para sa mga minimum wage earners sa Western Visayas.
Ini kasunod sang pag-aprubar sang Department of Labor and Employment (DOLE) sa dugang nga P40 tubtob P45 sa minimum wage sa rehiyon nga mangin epektibo sa Nobyembre 19, 2026.
Sa interview sang Bombo Radyo kay Elmer Forro, Secretary General sang Bayan Panay, iya ginpahayag nga indi lamang dapat magpabilin sa pag-aprubar sang wage increase ang tikang sang gobyerno, kundi kinahanglan siguruhon nga mabaton ini sang tanan nga kwalipikado nga mamumugon.
Suno kay Forro, dapat tutukan sang DOLE ang mga employer agud malikawan nga may mga kompanya nga indi magpatuman sang bag-o nga minimum wage rates.
Nahibaluan nga sa idalom sang bag-o nga wage order, ang sweldo sang agricultural workers magataas halin sa P520 mangin P565 kada adlaw, samtang ang non-agricultural workers sa establisemento nga may sobra sa 10 ka trabahador magabaton sang P590 halin sa P550.
Ang mga non-agricultural workers naman sa establisemento nga may 10 ukon mas manubo nga trabahador magabaton sang P565 halin sa P525 kada adlaw.
Samtang, ang minimum monthly wage sang mga domestic workers ukon kasambahay pagataas halin sa P6,500 mangin P7,000.
Dugang pa, kinahanglan nga hatagan man sang atensyon ang nagataas nga presyo sang mga balaklon kag iban pa nga panguna nga kinahanglanon bangud dako ini nga epekto sa adlaw-adlaw nga pangabuhi sang mga mamumugon.
