ROXAS CITY – Nabatyagan ang‘’Bayanihan Spirit’’ sa pungsod Japan sang mga OFWs bangud sa bulig nga ginapalab-ot sang pila ka grupo sa Filipino community sa mga Pinoy nga nadulaan sang trabaho bangud sa coronavirus disease 2019 pandemic.
Sa report ni Bombo International Correspondent Benjie Salve, tumandok sang Bacolod City kag nagatrabaho sa Japan, pila ka grupo sang mga Pinoy nga may mabinulawanon nga tagipusoon ang nagahatag sang bulig sa mga apektado nga Filipino workers nga nawad-an sang trabaho kag karon yara lamang sa ila ginaestaran.
Suno kay Salve nga maswerte ang iban nga mga Pinoy bangud sa pihak nga nag-intat na ang operasyon sang ila nga kumpaniya ginhatagan pa sila sang financial assistance.
Nahibaluan nga sarado tobtob sa karon ang tanan nga eskwelahan sa Japan kag hugot nga ginapatuman ang stay at home policy labi na sa mga estudyante.
Bukas man ang pila ka mga establisemento kag mga stores sa Hiroshima prefecture.
Apang nagagamit sila sang face mask sa tagsa ka maguwa sila sa balay bilang proteksyon man sa ila kaugalingon batuk sa coronavirus disease 2019.
Samtang ginkumpirma man ni Salve nga may tatlo ka Pinoy sa Tokyo, Japan ang nagpositibo sa COVId-19.
