ROXAS CITY – Nakit-an ang bayanihan spirit sa Tagaytay City matapos nagbuligay sa pagpala sang mga lapok sa dalan ang mga residente kasunod sang pag-ugdaw na sang madamol nga ash fall gikan sa bulkan Taal.
Sa interview sang Bombo Radyo Roxas kay Sangguniang Kabataan Federation President Lois Andrea Palo sang Sungay West, Tagaytay City, ginpahayag sini nga amat amat na nga nag-ugdaw ang ash fall apang nagapabilin nga wala sang kuryente kag tubig sa ila nga lugar.
Nagapabilin man sa ila mga balay ang mga residente sa diin oras oras may nagalibot nga mga opisyal sang barangay kag nagapahibalo sa status sang bulkan.
May ginprepara man nga mga hygiene kit kag nagapanagtag sang face masks sa maagihan nga mga residente, para masiguro nga indi maapektuhan ang ila nga ikaayong lawas.
Aminado man ang opisyal nga may pila ka mga residente gikan sa kaingud nga banwa nga naapektuhan sang ash fall ang nagpadulong na sa ila lugar, apang mas ginahatagan sang prayoridad ang mga residente sang Tagaytay pag-abot sa bulig.
Samtang nagpanic man ang pila ka mga residente sa naglapta nga fake news nga ginpahamtang na sa Alert Level 5 ang status sang bulkan Taal.
Bangud diri, nagpanawagan si Palo nga likawan magpalapta sang fake news sa sitwasyon karon sang bulkan.
Nagapanguna nga kinahanglanon sang mga tawo sa karon ang matinlo nga tubig nga ilimnon, pagkaon, hygiene kit kag face mask.
