Pabor si BB Gandanghari sa proposal nga amyendahan ang Juvenile Justice Law agud mapanubo ang edad sang kriminal nga responsibilidad halin sa 15 anyos pakadto sa 10 anyos.
Sa isa ka Facebook Live ni Senador Robin Padilla, ginpahayag ni BB nga nagapati siya sa katuyuan sang proposal.
Suno kay BB, ang katuyuan sang proposal sang iya utod indi nga silutan ukon prisuhon ang mga kabataan, kundi agud lamang nga mahadlok ang mga ini agud indi makakomiter sang sala.
Suno sa iya, luyag niya nga may yara sang “deterrent” agud mangin mahinalungon ang mga pamatan-on sa ila ginahimo.
Matandaan nga ginbalik liwat ang isyu sa pagpanubo sang edad sang criminal responsibility matapos ang shooting incident sa syudad sang Tacloban sa diin tatlo ka mga estudyante ang napatay.
Si Senator Robin Padilla ang isa sa mga nagaduso nga usisaon liwat ang proposal.
Apang ginpamatukan ini sang Akbayan Party-list kag ginpahayag nga ang kaangay nga trahedya ang ginagamit sa pagpasanyog sang isa ka proposal nga indi maayo para sa mga kabataan.
Magluwas sa pagbag-o sa Juvenile Justice Law, luyag man ni Robin nga may limitasyon sa paggamit sang social media sang mga menor de edad.
