-- ADVERTISEMENT --

Nagpakita sang abilidad ang pambato sang Pilipinas nga si Bea Millan-Windorski sa tion sang swimsuit fashion show sang 75th edition sang Miss Universe 2026 sa Puerto Rico, nga nagapakita sang pagsalig, pagkaelegante, kag ikasarang sa runway.

Ginpakita ni Bea ang iya poise kag mabaskog nga stage presence sa tion sang pasundayag, nga kabahin sang mga aktibidad para sa 75th anniversary sang prestihiyoso nga beauty pageant.

Apang, wala man nakalikaw sa mga kritisismo ang nasambit nga pasundayag matapos nga ginpahayag sang pila ka pageant fans ang ila pagkadismaya sa production sang aktibidad nga ginatawag nga “Beauty on the Beach.”

Ginkwestyon sang mga pageant enthusiasts ang kahimtangan sang entablado kag ang temporaryo nga runway nga hinimo sa tela nga ginlatag sa balas, nga suno sa ila wala naghatag sang husto nga kondisyon para sa mga kandidata nga magrampa.

May pila man ka kandidata nga nadulaan sang balanse kag natumba samtang nagarampa, lakip na si Bea kag si Clara Vegas sang Venezuela.

-- ADVERTISEMENT --

Bangud sini, nagdamo ang mga pamangkot kag kritisismo halin sa pageant personalities kag fans nahanungod sa kalidad sang production sang isa sa mga ginalauman nga aktibidad sa 75th edition sang Miss Universe.