ROXAS CITY – Magalab-ot sa 1,002 ka mga beneficiaries sang educational assistance, ang paga-akomodaron sang Department of Social Welfare and Development (DSWD) Region VI, para sa probinsya sang Capiz, buwas nga adlaw sang Sabado, Agosto 27.
Sa interview sang Bombo Radyo kay Atty. May Rago-Castillo, suno diri, ini amu ang mga nagpila kag wala na-akomodar sang Agosto 20 nga naka-fill out sang pormas kag nakuhaan sang numero, kag ang iban amu ang nakaparehistro online.
Yari ang numero sang mga benipsyaryo sa apat ka mga venue:
Capiz Villareal Stadium – 252
President Roxas gym – 250
Cuartero covered gym – 250
Sigma covered gym – 250
Suno pa diri, ginpadal-an ang mga ini sang text message uko e-mail sang DSWD, kun sa diin nakabutang ang ila venue sa pag-payout kag ang mga dapat dal-on sa venue.
Hugot nga paalinton sang ahensya nga indi magpadulong sa venue kun wala sang may nabaton nga text message nga may schedule na ini sa amu nga ayuda.
Naintindihan sang DSWD nga may pila ka mga ginikanan nga indi ‘techy’ ukon makahibalo sa pagparehistro online, apang suno diri, madamo na sila sang nabaton nga nagpa-online register, gani buligan nalang sang mga nakahibalo na ang wala pa makapa-rehistro online.
Sa mga natingala nga isa lang ka dokumento ang mahimo ma-upload, suno sa tagpamaba sang DSWD Region-VI nga normal lang ini, ang importante nga makapa-register kag madala ang kumpleto nga mga rekisitos sa adlaw sang payout para sa assessment.
Sa mga indi naman kwalipikado, pahanumdom sang ahensya nga indi na mag-usik sang oras nga magpa-rehistro bangud may assessment ang DSWD kun kwalipikado ang nagpa-register.
Matandaan nga ginpahayag ni DSWD Sec. Erwin Tulfo nga indi kwalipikado sa educational assistance ang mga scholars kag 4P’s beneficiary.
Nahibaluan nga P4 milyon ang pagagamiton nga pondo sa ika-duha nga Sabado sang tagtaganay, kag paalinton ni Atty. Castillo nga kinahanglan magparehistro online agud malakip sa mga masunod nga schedule sang tagtaganay.
