ROXAS CITY – Ginkumpirma sang social officer 3 kag in-charge sang senior citizen program sa DSWD Regional Office 6 nga may duha na ka mga banwa sa probinsiya sang Capiz nga nakabaton sang stipend para sa social pension sang mga katigulangan nga benepisyaryo sang programa.
Kalakip diri ang banwa sang Jamindan nga natapos na samtang padayon pa ang releasing sa banwa sang Pontevedra.
Ginpahayag ni Judith Barredo nga nagsugod na ang releasing sang social pension sang mga benepisyaryo para sa 1st semester sini nga tuig 2021.
Mas ginpa-temprano ang paghatag sang social pension sa mga benepisyaryo agud makabakal sang ila kinahanglanon nga bulong ukon pagkaon ang mga senior citizen.
Samtang ginsabat sang opisyal ang nagalapta nga balita nga ginatugyan sang DSWD Regional Office 6 ang pondo sa social pension sang mga katigulangan sa mga LGUs.
Suno kay Barredo nga mismo ang mga personnel sang Regional office sang DSWD ang naga-release sang stipend sang mga benepisyaryo kag wala nagapasilabot ang mga LGUs.
Ginpanindugan pa sini nga wala gintransfer sang ahensiya ang pondo sang amo nga programa sini nga tuig 2021 sa mga Local Government Units.
Kun makita man ang presensiya sang mga opisyales sang gobyerno nga nagaupod sa pagrelease sang pondo, sila ang naga-asister lamang sa mga personnel sang DSWD.
Antes magpadulong sa isa ka banwa ang DSWD para sa releasing sang stipend sa social pension, nagapakig-angut na ang ahensiya sa mga Municipal Social Welfare and Development.
Nahibaluan nga may 54mil 973 ka mga pensioner sa probinsiya sang Capiz nga benepisyaryo sang nasambit nga programa sang gobyerno.
