ROXAS CITY – Luyag nga imentinar sang Bureau of Fisheries and Aquatic Resources (BFAR-Capiz ang pangalan sang probinsya nga Seafood Capital of the Philippines.
Ini ang ginpahayag ni Edwin Javier, OIC sang BFAR-Capiz sang mainterview sang Bombo Radyo.
Suno kay Javier, obligasyon sang ahensya nga protektahan ang kadagatan kag dunang manggad sang probinsya kag magapanabat ang madakpan nga nagahalit diri.
Ang paggamit sang trawl ang may yara sang regulasyon kun sa diin mahimo nga makapangisda ang isa ka operator sa specific nga lugar kag siguruhon lamang nga may lisensya.
Ang sobra-sobra nga paggamit sini ang posible makahalit sa mga coral reefs nga nagaserbi puluy-an sang mga isda.
Samtang, ginsiling ni Javier nga napalab-ot na sang mga trawl operators ang ila problema kay Governor Fredenil Castro kag na desisyunan nga sang gobernador nga buligan ini nga makakuha sang lisensya.
Apang suno kay Javier, ginkanselar ini sang mga trawl operator.
Sa pihak nga bahin, hugot sa gihapon nga ginadumulian sang BFAR ang pagkaon, pagharvest kag pagbaligya sang mga panginhason nagikan sa kalalawran sang probinsya sang Capiz bangud nagapabilin nga mataas ang toxic level sang mga panginhason kag peligruso sa kabuhi sang tawo.
