Magapanagtag ang Bureau of Fisheries and Aquatic Resources Region 6 sang fuel subsidy sa mga manugpangisda sa Western Visayas.
Sa interview sang Bombo Radyo kay Director Remia Aparri sang BFAR Region 6, iya
ginpahayag nga ang nasambit nga programa ang gindihon agud makabulig sa mga apektado nga manugpangisda bangod sa padayon nga pagsaka sang presyo sang gatong sa pungsod.
Suno kay Aparri, magabaton ang mga qualified nga mga manugpangisda sang P2,235 kada isa.
Ang nasambit nga kantidad ang ginakabig nga makasarang para sa lima tubtob pito ka adlaw nga pagpangisda.
Pahayag pa niya,pgahatagan sang fuel cards ang mga manugpangisda sa mga lugar nga may madali nga access sa gasolinahan, samtang fuel vouchers naman ang ihatag sa mga malayo nga komunidad.
Nagpanawagan man ang natungdan nga kinahanglan nga rehistrado ang mga manugpangisda sa BoatR kag Registry System for Basic Sectors in Agriculture kag makakompleto sangrequirements agud makabaton sang benepisyo.
