Magapakita sang iya abilidad kag magadugang sang ihibalo sa collapsed structure search and rescue (CSSR) si Fire Officer II Rojan A. Guillermo sang Bureau of Fire Protection-Capiz, paagi sa iya pagpartisipar sa international nga training program sa Taiwan.
Sa interview sang Bombo Radyo kay Guillermo, iya ginpahayag nga daku ang kadungganan nga iya nabatyagan bangud sa importante ang amo nga training agud madugangan pa ang iya technical knowledge kag practical skills sa pagresponde sa mga insidente nga may collapsed structures.
Pahayag pa niya, daku ini nga oportunidad agud ma-develop ang iya abilidad sa pagpangita kag pag-rescue sang mga biktima, ilabi na sa tion sang linog kag iban pa nga kalamidad.
Dugang pa sang natungdan, pagagamiton niya ang mga bag-o nga ihibalo kag techniques nga iya matun-an sa training sa pagpalig-on sang rescue capabilities kag preparedness sang BFP-Capiz.
