ROXAS CITY-Liwat nga nagpanugyan ang mga katapo sang Bureau of Fire Protection -Capiz (BFP) sa publiko sa mga safety tips agud malikawan ang ano man nga sahi sang sunog kadungan sang piyesta minatay.
Sa interview sang Bombo Radyo sa kay Senior Fire Officer -II Marlon Garbo, Municipal Fire Marshal sang BFP-Panitan, ginpahayag sini nga ginatutokan sa karun sang mga katapo sang BFP ang pagsindi sang kandila sa mga tagsa ka mga panimalay.
Bangud ginalauman nga kadam-an sa mga pumuluyo ang maga-sindi sang kandila sa ila nga mga panimalay kadungan sang pagsarado sang mga patyo.
Bangud sini, ginpanugyan ni Garbo nga patyon ang mga kandila nga nakasindi sa altar antes magkatulog.
Patyon man ang mga baga sa dapog pagkatapos magluto sang mga kakanin agud indi paghalinan sang kalayo.
Magluwas diri, sekyaron man sang maayo kun may yara sang mga leak ang mga LPG tanks sa kusina.
Antes magkatulog, huklaon sa saksakan ang mga appliances nga nakasaksak sa mga saksakan kag iban pa.
Samtang ginpasalig ni Garbo nga magapabilin nga naka full alert ang mga katapo sang BFP sa adlaw sang mga minatay.
Suno kay Garbo nga may yara na sang direktiba gikan sa mataas nga talatapan sang BFP nga magapabilin nga alerto ang mga bombero kadungan sang Undas 2020.
