ROXAS CITY – Magapatigayon sang pila ka mga aktibidad ang katapo sang Bureau of Fire Protection (BFP) Capiz, kadungan sa ila pagselebrar sang ika-32nd Anniversary sa Agosto.
Sa interview sang Bombo Radyo kay Supt. Jeny Masip Provincial Fire Marshal sang BFP Capiz, ginpahayag sini nga sa Agosto 2 magasugod ang ila anibersaryo kun sa diin may tema nga “Modernong bombero kaakibat tungo sa ligtas at maunlad na pamayanan”.
Magasugod ang selebrasyon sa isa ka misa nga pagahiwaton sa Roxas City Fire Station, motorcade padulong sa isa ka dako nga mall sa Arnaldo Blvd. kung sa diin ipahamtang ang venue kag magahiwat sang programa kaparehas sang photo exhibit.
Gintuad man ni Masip nga isa sa highlight sang ila aktibidad amu ang tree planting nga pagahiwaton sa Agosto 8 sa banwa sang Mambusa, outreach program nga patigayunon sa Ivisan sa Agosto 14 subong man magapatigayon ang tanan nga katapo sang BFP sang weekly feeding program sa ila tagsa ka mga kabanwahanan kag BFP band sa Agosto 16, BFP fire square road show kung sa diin ma-eksperyensyahan sang mga kabataan kun paano mangin isa ka bombero nga pagahiwaton naman sa Agosto 16 tubtob 17.
Mahibaluan nga sang damlag lang nakabaton ang ahensya sang 25kls nga bugas nagikan sa national government kung sa diin ginkamaayo sini nila nga i-donate sa fire station kag pagagamiton para sa weekly feeding program.
Mangin kabahin sa amu nga programa ang mga barangay nga labing nagakinahanglan kag pigado.
May yara man sang patigayunon nga mural painting contest ang ahensya kung sa diin magapasakop ang tanan nga mga municipal fire station.
Bangud sini, gina-imbitahan sang BFP Capiz nga magtambong kag saksihan ang ila mga ginpangpreparar nga aktibidad kag programa bangud ginapasiguro sini nila nga madamo sang may makuha kag matun-an nga leksyon ang tanan ilabi na pag-abot sa pagtapna sang sunog.
