ROXAS CITY – Kadungan sang pagselebrar sang kapistahan ni San Juan Bautista sa Hunyo 24, Sabado nga adlaw, liwat nga nagapahanumdom ang katapo sang Bureau of Fire Protection sa mga pumuluyo sang mga tikang kun paano malikawan ang sunog sa puluy-an.
Sa interview sang Bombo Radyo kay Supt. Jenny Mae Masip Provincial Fire Marshal – BFP Capiz, ginsiling sini nga bilang ila pagpreparar sa amu nga selebrasyon, magapahamtang sila sang mga first aid responders sa mga lugar kun sa diin padulungan sang mga pumuluyo agud magselebrar partikular sa mga baybayon, beach and resorts, mga suba, kag mga dam.
Suno kay Masip naga-conduct man sila sang fire safety inspection sa mga beach ka resorts agud masiguro nga luwas ang ila tagsa ka mga bisita kag tanan nga mga magapadulong sa lugar kag malikawan ang anu man nga sahi sang insidente ilabi na ang sunog.
Ginapahanumdum man sini nga samtang nagasaulog sang San Juan antes magbaya sa tagsa ka mga puluy-an indi pagkalipatan nga i-unplug ang tanan nga mga electrical appliances ukon mahimo i-off na lamang ang main switch, siguraduhon nga naka-off ang tangke sang LPG kag likawan man nga magbilin sang mga nagasindi nga pailaw ilabi na sa mga abuhan nga una na nga ginatunaan sang sunog.
