Nagpaabot sang sinsero nga pagpasalamat kag pagkilala ang Bureau of Fire Protection (BFP)–Capiz kay FSSUPT Eden M. Altamia-Baua, DSC, bangud sa iya dedikasyon kag pagpanguna bilang Provincial Fire Marshal sang BFP-Capiz.
Sa ginpaguwa nga pahayag sang ahensya, ginpasalamatan nila ang iya pagpangabudlay, paggiya kag importante nga kontribusyon sa misyon sang BFP nga protektahan ang kabuhi kag mga propiedad, kag masiguro ang kaluwasan kag kaayuhan sang komunidad.
Ginpabutyag man sang BFP-Capiz ang ila pagpasalamat sa iya serbisyo para sa probinsya sang Capiz, ilabi na sa pagbulig sa pagpatuman sang mga programa kag buluhaton sang ahensya para sa seguridad sang publiko.
Samtang magasugod naman si Altamia-Baua sa iya bag-o nga assignment, ginpanginbulahan naman siya sang BFP-Capiz para sa padayon nga Kadalag-an kag katumanan sa iya masunod nga katungdanan.
Ginpasalamatan man sang ahensya ang iya dedikado nga serbisyo sa BFP-Capiz kag ginpabutyag ang handum nga padayon pa ang iya makahulugan nga mga nahimo sa iya bag-o nga katungdanan.
