Nagpatigayon ang Bureau of Fire Protection (BFP) Capiz sang Mental Health and Psychosocial Support (MHPSS) Activity agud mapauswag ang mental health kag kabug-usan nga kaayuhan sang ila mga personnel.
Ginpangunahan ang aktibidad sang Office of the Provincial Fire Marshal sa pagpanguna ni FSSUPT Eden M. Altamia-Baua, DSC, sa pakig-angut sa Provincial Health Office.
Nagtambong man sanday FCINSP Elvira B. Alvero, Provincial Deputy kag Chief sang Administrative Branch, kag FINSP Rayman D. Vela, Municipal Fire Marshal sang Tapaz Fire Station.
Nangin resource speaker si Ma. Cristina Senosa, Health Program Researcher, upod kanday Jay Agarrado, Nurse II; Myleen Dogelio, Population Program Officer II; kag Mary Grace Somil, Population Program Officer III.
Sa tion sang aktibidad, ginhinalaan ang importansya sang mental health, husto nga pagdumala sang stress, kag Psychological First Aid ukon mga inisyal nga bulig psychological para sa mga tawo nga nakaeksperyensya sang kakulba ukon mabudlay nga sitwasyon.
Lakip man sa aktibidad ang body mapping kag psychological processing nga nagatugot sa mga partisipante nga mapahayag kag maproseso ang ila mga balatyagon, mas mahangpan ang epekto sang stress, kag matun-an ang maayo nga pamaagi sa pag-atubang sa mga kabudlayan.
Pinaagi sa sini nga inisyatibo, ginpabakod sang BFP Capiz kag Provincial Health Office ang ila dedikasyon sa pagpalapnag sang kaayuhan sa panghunahuna kag emosyonal nga kahimtangan sang mga bombero kag iban pa nga personnel.
Suno sa BFP, importante ang mental wellness, emosyonal nga pagkamabakod, kag husto nga pagdumala sang stress agud mapabilin ang kahandaan sang mga personnel sa pagresponde sa emerhensya kag makahatag sang epektibo nga serbisyo publiko.
Sa pagpanguna ni FCSUPT Wilberto Rico Neil A. Kwan Tiu, OIC sang BFP, kag FCSUPT Edwin P. Vargas, DSC, Regional Director sang BFP Region 6, padayon nga ginatutukan sang ahensya ang kaayuhan sang ila mga personnel paagi sa paghimo sang mga tikang nga nagasuporta sa mental health kag nagapalig-on sang pagbinuligay sang mga katapo sang bombero.
