ROXAS CITY – Padayon sa paghatag sang panugyan ang Bureau of Fire Protection (BFP) sa publiko agud malikawan ang pagluntad sang sunog ilabi na subong nga nagahilapit nga holiday season.
Ini ang ginpahayag ni Senior Fire Officer 2 Marlon Garbo, ang pinuno sang Operations Section sang BFP-Capiz sang mainterview sang Bombo Radyo.
Suno kay Garbo, wala nagauntat ang ila hanay sa pag-edukar sa pumuluyo agud makalikaw sa pagluntad sang sunog.
Ginpahayag sini nga masako sila sa ila nga kampanya pinaagi sa pagpatigayon sang Ugnayan sa Barangay kun sa diin nagapakig-angut sila sa mga barangay officials.
Pinaagi diri suno kay Garbo ila nga matumod ang mga fire-prone areas nga dapat nila nga tutukan sa pag-edukar sang mga pamaagi agud makalikaw sa sunog.
Magluwas diri suno kay Garbo, nagapadulong man sila sa mga eskwelahan kag nagapatigayon sang education campaign natuhoy sa ila nga kampanya.
Ginapadulungan man sang hanay sang BFP ang pila ka mga private kag public commercial establishments para magpatigayon sang mga fire drills.
Ginapasangkad man sang BFP ang ila nga fire-truck visibility kag nagapabilin nga alerto sa tanan nga oras kag nakahanda nga magresponde sa tion nga kinahanglanon.
Sa ulihi, nagpanawagan si Garbo sa publiko nga likawan ang paggamit sang palupok sa Paskwa kag Bag-ong Tuig agud maluwas sa katalagman.
