ROXAS CITY – Ginbali sang tagdumalahan sang Dumalag Fire Station ang pila ka mga alegasyon nga ginahaboy angut sa ila pagresponde sa nagluntad nga sunog kahapon nga adlaw sa Poblacion, sa amu nga banwa.
Nahibaluan nga ginkilala ang tag-iya sang balay kay Melva Fetalino, 57-anyos.
Sa interview sang Bombo Radyo kay Senior Fire Officer 2 O Onato, acting Municipal Fire Marshal sang Dumalag, ginpahayag sini nga nangin madasig ang ila pagresponde sa amu nga sunog kun sa diin alas-4:50 sa hapon sang ginpahibalo ang ila istasyon kag alas-4:54 sa amu man nga hapon sang nakaabot sila sa lugar sang insidente, alas-5:27 sang gindeklarar nga fire under control kag natigayon nga mapalong ang kalayo alas-5:46 man sa amu nga hapon.
Ginbatak man suno diri sa 2nd alarm ang amu nga sunog.
Sa alegasyon nga wala sang masiyado nga unod nga tubig ang fire truck, gin-aku ni Onato nga nawasak ang bolt joint sang ila fire truck rason nga naapektuhan ang ila pagpalong sang kalayo.
Apang antes sini, natigayon na nga makapangayo sang bulig ang ila istasyon sa mga kaiping nga banwa kag nakaresponde ang fire trucks sang Tapaz, Dumarao, Cuartero kag Dao.
Aminado man si Onato nga posible bangud tuman na ka daan ang ila fire truck rason nga wala na masarangan ang ila operasyon.
Nahibaluan nga sumugod tuig 2003 pa ang pagpanerbisyo sang ila fire truck apang natigayon naman suno diri sila nga maka-request sang panibag-o nga fire truck.
Sa karon wala pa matumod ang gintunaan sang kalayo apang may ginasundan na sila nga anggulo sa pagtumod sini.
Nagdangat man sa kapin P960,000 ang inisyal nga nangin kahalitan sang sunog.
